Kuthiwani uma inkunzi isisele yodwa esibayeni? Lapha sikhuluma ngeNissan NP200. Lesi sikhondlakhondla sebakkie sekuyisona kuphela esisele sodwa kumabakkie okuthiwa amahalf-tonne eNingizimu Afrika kulandela ukuhoxa ezweni kukaGeneral Motors. Okumangazayo ukuthi mhlasimbe ngabe ayihambi ibakkie yakwaGM ukube isabizwa ngeCorsa Utility futhi isengaphansi kwabakwaOpel. UOpel usazohlala ezweni noma uzobe engasayena inkampani yakwaGM. Kwezezimoto ngeke wazisisa ukuthi kwenzakalani. Abanikazi abasha beOpel, uPeugeot Citroen bamatasa ngebakkie ezodayiswa lapha eAfrika. Ngeke wazi noma leyobakkie yakwaPuegeot iyogcina inobhuti omncane wehalf-tonne ongagcine efike lapha eNingizimu Afrika esibizwa ngeOpel Utiliy. Nokho siyakelelaza, asibuyele odabeni esiphezu kwalo, iNissan NP200.

INissan NP200 itholakala ngezinjini ezimbili zikapetrol kanye neyodwa kadizili. Ezikapetrol ziyi1.6 eyi8valve kanye ne16valve. Ziyashiyana nangamandla, lena ka8-valve ino 64kW wamandla kanti lena ka16-valve ino 77kW wamandla. Injini kadisili iyi1.5 bese iba namandla ka63 kW. Yize inamandla amancane, izishaya zonke emakhanda ngetorque ka200Nm. Idisili ibuye idlise kokudla kancane udisili yize nazo lezi zikapetrol kuthiwa azilumi ephaketheni uma sekuthelwa. AmaNP200 atholakala ngemanual kuphela.

Ngaphambili yize iNP200 ihlala abantu ababili, umshayeli nomgibeli bahlala benethezeke. Ngemuva kwezihlalo iNP200 inesikhala sokufaka izimpahla esanele ukufaka isikhwama esikhudlwana. Uma kuyimoto oyisebenzisela umsebenzi, ibhokisi lamathuluzi lingahlala kahle. INP200 lena ebesihamba ngayo okuyi1.5 dCi High inamawindi kagesi, izibuko ezilungiswa ngogesi kanye neradio enebluetooth. Asiyithakaselanga indawo okubekwe kuyona izinkinobho zokuvula amawindi nokho. Zibekwe phaphi kwegiya, okwenza kubenzinyana ukuzisebenzisa.

Ungadideki iNP200 iyawazi umsebenzi wayo. Lena ebesihamba ngayo siyisebenzise ukuthwala amaphalethi ayisithupha. Iwathwale ngaphandle kokunanaza. Eyethu ibifakwe irubha emunyama eyenzelwe ukuthwala izinto ezinjengamaphalelithi kungayilimazi.
INP200 iwundabuzekwayo nasekhuphepheni. INP200 1.5 kadisili lena ebesihamba ngayo inezikhwama zomoya ezivikelanayo umu uba sengozini. Iphinde futhi ibe namableki angazikhiyi (ABS) uma usengozini okwenza amathuba akho okukwazi ukuzikhipha otakwini ande. AbakwaNissan bathi izigebengu azikhohlwe ukuthatha lemoto ngoba ukhiye ufakwe ichip eyenza injini yazi ukuthi imoto isetshenziswa nguwe.

Abiza kanjena amaNP200:
NP200 1.6 8V Base isukelakuR164,900
NP200 1.6 8V Base A/C + Safety Pack isukelakuR182,500
NP200 1.6 16V Mid Dual Airbags isukelakuR194,900
NP200 1.6 16V High isukelakuR225,400
NP200 1.5dCi Base A/C + Safety isukelakuR228,500
NP200 1.5dCi High isukelakuR247,500